घटना भएपछि होइन, घटना हुनुअघि नै सावधानी : आफ्नै खर्चमा गाउँ उज्यालो बनाउँदै समाजसेवी सारजङ्ग थापा

बारा । पछिल्लो समय बाराका विभिन्न स्थानमा चोरी, बालबालिका हराउने तथा अन्य आपराधिक गतिविधिका घटना सार्वजनिक भइरहेका बेला कोल्हवी नगरपालिका–५ अन्तर्गत पर्ने रामवन गाउँमा समाजसेवी सारजङ्ग थापाले आफ्नै खर्चमा पोलमा बत्ती जडान गरेका छन्। रातको समयमा गाउँ तथा आसपासका क्षेत्र अँध्यारो हुँदा हुनसक्ने सम्भावित जोखिमलाई मध्यनजर गर्दै थापाले व्यक्तिगत खर्चमा बत्ती जडान गरेका हुन्।

गाउँमा लामो समयदेखि रातको समयमा आवश्यक उज्यालोको अभाव रहँदै आएको थियो। स्थानीयवासीले सम्बन्धित निकायको ध्यानाकर्षण गराउँदै आए पनि महिनौँ बितिसक्दा समेत अपेक्षाअनुसार काम हुन नसकेको भन्दै थापाले आफैँ पहल गरेका हुन्।

थापाका अनुसार पछिल्लो समय बाराका विभिन्न क्षेत्रमा चोरीका घटना हुनुका साथै बालबालिका हराउने लगायतका घटनाले समाजमा सुरक्षा चिन्ता बढाएको छ। यस्ता घटना भइसकेपछि मात्रै सक्रिय हुनुभन्दा घटना हुनुअघि नै सम्भावित जोखिम न्यूनीकरणका लागि सावधानी अपनाउनु आवश्यक रहेको उनको भनाइ छ।

समाजसेवी थापाले भने, “केही घटना भइसकेपछि पछुताउनुभन्दा घटना हुनुअघि नै सावधानी अपनाउनु राम्रो हो। गाउँमा रातिको समयमा अँध्यारो हुँदा सुरक्षा चुनौती थपिन सक्छ। त्यसैले आफ्नो तर्फबाट सकेको सहयोग गरेको हुँ।”

उनले पोलमा बत्ती जडान गर्नु कुनै प्रचार वा व्यक्तिगत स्वार्थका लागि नभएको बताउँदै समाजमा आवश्यक देखिएको काममा आफूले सक्दो योगदान गर्ने उद्देश्य रहेको बताए। स्थानीयवासीको सुरक्षामा केही हदसम्म भए पनि सहयोग पुग्ने विश्वासका साथ आफ्नै खर्चमा उक्त कार्य गरिएको उनको भनाइ छ।

पछिल्लो समय बारामा चोरीका घटनासँगै बालबालिका हराउने घटनाले अभिभावकलाई थप चिन्तित बनाएको छ। बालबालिका घरबाट बाहिर निस्किएपछि सुरक्षित रूपमा घर फर्किन्छन् कि फर्किँदैनन् भन्ने चिन्ता अभिभावकमा देखिने गरेको छ। यस्ता घटनाको जोखिम न्यूनीकरणका लागि प्रहरी प्रशासनको सक्रियतासँगै स्थानीय तह, समुदाय र नागरिक स्वयं पनि सचेत हुनुपर्ने आवश्यकता देखिएको छ।

रामवन गाउँमा बत्ती जडान भएपछि रातको समयमा आवतजावत गर्ने स्थानीयवासीलाई समेत सहज हुने भएको छ। त्यस्तै, गाउँका अँध्यारा स्थानमा हुने सम्भावित चोरी तथा अन्य आपराधिक गतिविधिमाथि निगरानी राख्नसमेत केही सहज हुने अपेक्षा गरिएको छ।

सामाजिक काममा निरन्तर सक्रिय

थापाका लागि पोलमा बत्ती जडान गरेको यो काम पहिलो सामाजिक कार्य भने होइन। उनी लामो समयदेखि विभिन्न माध्यमबाट सामाजिक सेवा तथा समुदायका लागि आवश्यक सहयोगका काम गर्दै आएको बताइएको छ।

स्थानीयस्तरमा समस्या देखिएपछि सम्बन्धित निकायको मुख ताकेर मात्र बस्नुभन्दा आफ्नो क्षमताअनुसार सहयोग गर्ने उनको शैली रहेको छ। आर्थिक, सामाजिक तथा समुदायको आवश्यकता अनुसार विभिन्न समयमा सहयोग गर्दै आएको थापाको भनाइ छ।

उनका अनुसार समाजमा परिवर्तन ल्याउन ठूला कुरा र भाषणभन्दा पनि आवश्यक परेको समयमा गरिने सानो सहयोगले ठूलो अर्थ राख्न सक्छ। त्यसैले आफूले समाजमा आवश्यक देखिएका काममा निरन्तर योगदान गर्दै आएको उनले बताए।

“समाज सेवा भनेको एउटा कार्यक्रम गरेर सकिने कुरा होइन। समाजमा जहाँ आवश्यकता देखिन्छ, त्यहाँ आफ्नो क्षमताअनुसार सहयोग गर्नुपर्छ,” थापाले भने।

रामवनमा बत्ती जडान भएपछि स्थानीयवासीले पनि थापाको पहलको प्रशंसा गरेका छन्। स्थानीयका अनुसार गाउँमा रातिको समयमा उज्यालोको व्यवस्था हुनु सामान्य विषय जस्तो देखिए पनि सुरक्षा दृष्टिले यसको महत्वपूर्ण भूमिका हुन्छ।

स्थानीयवासीले भने यस्ता काम व्यक्तिगत पहलमा मात्र सीमित नराखी स्थानीय तहले पनि गाउँ–गाउँमा आवश्यक सडक बत्ती, सीसीटीभी, सुरक्षा निगरानी तथा अन्य पूर्वाधारको व्यवस्था गर्नुपर्ने माग गरेका छन्।

समाजमा चोरी, बालबालिका हराउने तथा अन्य आपराधिक घटना हुन नदिन प्रहरी प्रशासनको भूमिका महत्वपूर्ण भए पनि समुदायस्तरमा अपनाइने सावधानी पनि उत्तिकै आवश्यक रहेको स्थानीयको बुझाइ छ।

सम्बन्धित निकायले लामो समयसम्म चासो नदेखाएको अवस्थामा थापाले आफ्नै खर्चमा बत्ती जडान गरेर स्थानीय सुरक्षामा योगदान पुर्‍याएका छन्। उनको यो पहलले “घटना भएपछि खोज्नुभन्दा घटना हुनुअघि नै सावधानी अपनाऔँ” भन्ने सन्देशसमेत दिएको छ।

रामवनमा जडान गरिएको बत्तीले गाउँ उज्यालो पार्नुका साथै सम्भावित जोखिम न्यूनीकरणमा सहयोग पुग्ने अपेक्षा गरिएको छ। साथै, नागरिकस्तरबाट सुरु भएको यस्तो पहललाई स्थानीय सरकार र सम्बन्धित निकायले समेत निरन्तरता दिँदै समुदायको सुरक्षा र पूर्वाधार विकासमा प्रभावकारी भूमिका खेल्नुपर्ने आवश्यकता देखिएको छ।