सपही–प्रसौना सडकमा समा कन्स्ट्रक्सनको चरम ढिलासुस्ती : खाल्डो खनेर ‘ज्यान मार्ने पासो’, कोल्हवी नगरपालिका र वडा नं. ६ मौन !
सुरज बिक्रम, कोल्हवी । बाराको कोल्हवी नगरपालिका–६ अन्तर्गत सपही–प्रसौना सडकखण्डमा निर्माणाधीन पुल तथा सडक संरचनाको काममा चरम ढिलासुस्ती र लापरबाही भएको भन्दै स्थानीयले निर्माण कम्पनीसँगै कोल्हवी नगरपालिका र वडा कार्यालयको भूमिकामाथि प्रश्न उठाएका छन्।
पुल निर्माणका लागि सडकमा खाल्डो खनिएको लामो समय बितिसक्दा पनि निर्माण कार्यले अपेक्षित गति लिन नसकेको स्थानीयको गुनासो छ। निर्माणस्थल अस्तव्यस्त अवस्थामा रहँदा दैनिक आवतजावत गर्ने सर्वसाधारणले ठूलो सास्ती खेप्नुपरेको छ।
स्थानीयका अनुसार निर्माणको जिम्मेवारी पाएको समा कन्स्ट्रक्सनले कामलाई तीव्रता दिनुको सट्टा निर्माणस्थललाई लामो समयसम्म अलपत्र अवस्थामा छाडेको छ। सडकमा खाल्डो खनिएपछि त्यसलाई सुरक्षित व्यवस्थापन गर्नुपर्ने भए पनि न पर्याप्त सुरक्षा व्यवस्था गरिएको छ, न यात्रुलाई सचेत गराउने प्रभावकारी सूचना राखिएको छ।
सबैभन्दा गम्भीर विषय त के छ भने प्रसौना बजारबाट सपहीतर्फ आउँदा सोनाभार गाउँ भएर वैकल्पिक बाटो प्रयोग गर्नुपर्ने अवस्थाबारे जानकारी दिने सामान्य सूचना बोर्डसमेत राखिएको छैन। त्यसैगरी सपहीबाट प्रसौना जाने यात्रुलाई पनि निर्माणाधीन क्षेत्रको जोखिम र वैकल्पिक मार्गबारे स्पष्ट जानकारी दिने व्यवस्था नहुँदा यात्रुहरू अन्योलमा पर्ने गरेका छन्।
निर्माणस्थलमा चेतावनी बोर्ड, दिशासूचक बोर्ड, सुरक्षा संकेत तथा आवश्यक घेराबार नहुँदा दुर्घटनाको जोखिम बढेको स्थानीय बताउँछन्। विशेषगरी रातिको समयमा निर्माणस्थलमा पर्याप्त सुरक्षा प्रबन्ध नहुँदा मोटरसाइकल तथा अन्य सवारीसाधन दुर्घटनामा पर्न सक्ने जोखिम रहेको उनीहरूको भनाइ छ।
“पुल बनाउन खाल्डो खनिएको छ, तर काम समयमै सकिँदैन। खाल्डो पनि सुरक्षित छैन। न बोर्ड छ, न यात्रुलाई वैकल्पिक बाटो देखाइएको छ। भोलि ठूलो दुर्घटना भयो भने जिम्मेवारी कसले लिन्छ?” स्थानीयको प्रश्न छ।
स्थानीयले निर्माण कम्पनीलाई मात्र दोष दिएर उम्कन नमिल्ने बताएका छन्। उनीहरूका अनुसार निर्माण कार्य कोल्हवी नगरपालिका–६ भित्र सञ्चालन भइरहेकाले कोल्हवी नगरपालिका र वडा कार्यालयले निर्माणको अवस्था, कामको गति र सुरक्षाका विषयमा नियमित अनुगमन गर्नुपर्ने हो। तर निर्माणस्थलको अवस्था हेर्दा सम्बन्धित निकायको प्रभावकारी निगरानी र समन्वयमाथि नै प्रश्न उठेको स्थानीयको भनाइ छ।
नगरपालिकाले विकास निर्माणका योजना सञ्चालन गर्नु मात्रै पर्याप्त नभई ती योजनाको कार्यान्वयन कसरी भइरहेको छ, ठेकेदारले सम्झौताअनुसार काम गरिरहेको छ कि छैन, नागरिकलाई कति समस्या परेको छ र निर्माणस्थल सुरक्षित छ कि छैन भन्ने विषयमा अनुगमन गर्नुपर्ने स्थानीयको माग छ।
महिनौँसम्म काम सुस्त गतिमा चलिरहँदा समेत नगरपालिकाले निर्माण कम्पनीलाई काम तीव्र पार्न दबाब दिएको देखिएन भन्ने गुनासो स्थानीयको छ। ठेकेदार खोज्नुपर्ने अवस्था आउने, काम सुरु गरेर लामो समयसम्म अलपत्र छाड्ने र नागरिकलाई जोखिमपूर्ण बाटो प्रयोग गर्न बाध्य बनाउने प्रवृत्तिमाथि नगरपालिका गम्भीर बन्नुपर्ने स्थानीयको माग छ।
निर्माणाधीन सडकमा खाल्डो खनेर छाड्नु सामान्य विषय नभएको स्थानीय बताउँछन्। यस्तो अवस्था तत्काल व्यवस्थापन नगरे दुर्घटना हुनसक्ने उनीहरूको चेतावनी छ। विकास निर्माणको नाममा सर्वसाधारणको आवतजावत नै जोखिममा पार्ने अवस्था स्वीकार्य नहुने उनीहरूको भनाइ छ।
स्थानीयले अब समा कन्स्ट्रक्सनले काम कहिले सम्पन्न गर्ने, निर्माणमा भएको ढिलाइको कारण के हो, निर्माणस्थल किन सुरक्षित बनाइएको छैन र कोल्हवी नगरपालिका–६ तथा नगरपालिकाले अहिलेसम्म प्रभावकारी अनुगमन किन गर्न सकेनन् भन्ने प्रश्नको जवाफ खोजेका छन्।
सम्बन्धित निकायले तत्काल स्थलगत अनुगमन गरी निर्माण कम्पनीलाई काम तीव्र पार्न निर्देशन दिनुपर्ने, निर्माणस्थलमा सुरक्षा घेरा तथा चेतावनी बोर्ड राख्नुपर्ने र वैकल्पिक बाटो स्पष्ट रूपमा देखाउनुपर्ने स्थानीयको माग छ।
अब हेर्नुपर्ने विषय यही हो—कोल्हवी नगरपालिका नागरिकको समस्या समाधान गर्न मैदानमा उत्रिन्छ कि खाल्डोमा परिणत भएको सडकलाई हेरेरै बस्छ? पुल निर्माणका नाममा खनिएको खाल्डो कहिलेसम्म सर्वसाधारणका लागि जोखिमको कारण बनिरहने हो भन्ने प्रश्नको जवाफ सम्बन्धित निर्माण कम्पनीसँगै कोल्हवी नगरपालिका र वडा नं. ६ ले दिनुपर्ने अवस्था आएको छ।
