कांग्रेसको १५औँ महाधिवेशन : मकवानपुर–१ सहसचिवमा सुनिल राउतको उम्मेदवारी घोषणा
हेटौँडा, मकवानपुर । नेपाली कांग्रेसको १५औँ महाधिवेशन नजिकिँदै गर्दा मकवानपुरमा पार्टीको नयाँ नेतृत्व चयनका लागि राजनीतिक गतिविधि तीव्र बनेको छ। यसै क्रममा मकवानपुर प्रतिनिधिसभा क्षेत्र नं. १ को क्षेत्रीय समितिको सहसचिव पदका लागि युवा नेता सुनिल राउतले उम्मेदवारी घोषणा गरेका छन्।
युवा पुस्ताको प्रतिनिधित्व गर्दै उम्मेदवारी घोषणा गरेका राउतले पार्टी संगठनलाई समयानुकूल, प्रविधिमैत्री, गतिशील र कार्यकर्तामुखी बनाउने उद्देश्यसहित आफू चुनावी मैदानमा उत्रिएको बताएका छन्। उनले ‘युवाको ऊर्जा, कांग्रेसको नीति, समृद्ध नेपालका प्रतिबद्धता’ भन्ने मूल संकल्पका साथ संगठनमा नयाँ सोच र कार्यशैली विकास गर्नुपर्नेमा जोड दिएका छन्।
राष्ट्रियता, लोकतन्त्र र समाजवादलाई पार्टीको मूल वैचारिक आधारका रूपमा आत्मसात् गर्दै राउतले कांग्रेसभित्र युवा पुस्ताको सक्रिय र प्रभावकारी सहभागिता आवश्यक रहेको बताएका छन्। उनका अनुसार बदलिँदो राजनीतिक तथा सामाजिक परिवेशअनुसार पार्टी संगठनलाई पनि आधुनिक र प्रविधिमैत्री बनाउँदै लैजानुपर्ने आवश्यकता छ।
राउतले क्षेत्र नं. १ का कार्यकर्ता तथा आम नागरिकसँग जोडिएका विभिन्न विषयलाई आफ्नो प्राथमिकतामा राखेका छन्। विशेषगरी युवालाई स्थानीय स्तरमै रोजगारी तथा स्वरोजगारका अवसर सिर्जना गर्ने, उद्यमशीलता प्रवर्द्धन गर्ने र युवाको क्षमता विकासमा पार्टी संगठनमार्फत पहल गर्ने उनको प्रतिबद्धता छ।
त्यसैगरी किसान, श्रमजीवी मजदुर तथा निम्न आय भएका वर्गको हकहितका विषयलाई प्राथमिकताका साथ उठाउने उनले बताएका छन्। शिक्षा, स्वास्थ्य तथा आधारभूत पूर्वाधारको विकासलाई थप प्रभावकारी बनाउन सम्बन्धित तहमा आवाज उठाउने उनको एजेण्डामा उल्लेख छ।
पार्टी संगठनभित्र पारदर्शिता, उत्तरदायित्व र जवाफदेहितालाई प्राथमिकता दिने बताउँदै राउतले भ्रष्टाचारमुक्त र जनमुखी संगठन निर्माणमा आफूले भूमिका खेल्ने प्रतिबद्धता व्यक्त गरेका छन्। साथै, समावेशी तथा समानुपातिक प्रतिनिधित्वको सिद्धान्तलाई व्यवहारमा कार्यान्वयन गर्दै कांग्रेस संगठनलाई थप सुदृढ बनाउन निरन्तर सक्रिय रहने उनले बताएका छन्।
‘हाम्रो पार्टी, हाम्रो जिम्मेवारी’ भन्ने नारासहित उम्मेदवारी घोषणा गरेका राउतले क्षेत्र नं. १ का क्षेत्रीय प्रतिनिधि, ज्येष्ठ राजनीतिज्ञ, नेता तथा कार्यकर्तासँग आफूलाई समर्थन र मत प्रदान गर्न अपिल गरेका छन्।
उनको उम्मेदवारीसँगै मकवानपुर क्षेत्र नं. १ को कांग्रेसभित्र युवा नेतृत्व र संगठनको आगामी कार्यदिशाबारे बहस थप रोचक बनेको छ। राउतले आफ्नो उम्मेदवारीलाई व्यक्तिगत पदको आकांक्षाभन्दा पनि संगठनमा युवा पुस्ताको सहभागिता र नयाँ कार्यशैली स्थापित गर्ने प्रयासका रूपमा प्रस्तुत गरेका छन्।
