कोल्हवी नगरपालिका–५ मा सार्वजनिक जग्गा संरक्षणमा कडाइ, वडा प्रमुख नन्द किशोर चौधरीको चेतावनी
बारा — कोल्हवी नगरपालिकाको वडा नं. ५ मा सार्वजनिक तथा सरकारी जग्गा संरक्षणका लागि कडा कदम चालिएको छ। वडा कार्यालयले जारी गरेको सूचनाअनुसार सार्वजनिक जग्गामा भइरहेको अतिक्रमण नियन्त्रण गर्न अभियान तीव्र पारिएको हो।
वडा प्रमुख नन्द किशोर चौधरीले सार्वजनिक जग्गामा अनधिकृत रूपमा कुनै पनि संरचना निर्माण नगर्न स्पष्ट चेतावनी दिएका छन्। उनले भने, “सार्वजनिक सम्पत्ति सबैको साझा सम्पत्ति भएकाले यसको संरक्षणमा सबैले जिम्मेवार बन्नुपर्छ।”
सूचनाअनुसार यदि कसैले सार्वजनिक जग्गामा अवैध रूपमा घर, टहरा वा अन्य संरचना निर्माण गरेको भए १५ दिनभित्र आफैं हटाउन निर्देशन दिइएको छ। अन्यथा प्रचलित कानुनअनुसार कडा कारबाही गरिने वडा कार्यालयले जनाएको छ।
त्यस्तै, सडक छेउछाउ अतिक्रमण गर्ने, दिशापिसाब गर्ने तथा फोहोर फाल्ने जस्ता गतिविधि नगर्न समेत आग्रह गरिएको छ। यस्ता कार्य जारी राखेमा वडा कार्यालयबाट प्रदान गरिने सेवा–सुविधा तथा सिफारिसमा असर पर्न सक्ने चेतावनी समेत दिइएको छ।
वडा प्रमुख चौधरीले सार्वजनिक सम्पत्तिको संरक्षणमा स्थानीयवासीको सक्रिय सहयोग आवश्यक रहेको उल्लेख गर्दै सबैलाई नियम पालन गर्न अपिल गरेका छन्।
