बलुवाको सार्वजनिक भवन गोदाममा परिणत भएको आरोप, कोल्हबीमा छानबिनको माग
कोल्हबी । कोल्हबी नगरपालिका वडा नं. ५ मा सार्वजनिक प्रयोजनका लागि निर्माण गरिएको भवन निजी व्यापारीद्वारा मकै भण्डारण (गोदाम) का रूपमा प्रयोग भइरहेको आरोप सार्वजनिक भएपछि स्थानीय स्तरमा विवाद बढ्दै गएको छ।
स्थानीयवासीहरूले जनताको करबाट निर्माण गरिएको संरचना समुदायको हितका लागि प्रयोग हुनुपर्नेमा निजी प्रयोजनमा प्रयोग भइरहेको भन्दै असन्तुष्टि व्यक्त गरेका छन्। उनीहरूका अनुसार भवन निर्माणको उद्देश्य र वर्तमान प्रयोगबीच ठूलो अन्तर देखिएको छ, जसले सार्वजनिक सम्पत्तिको संरक्षण र व्यवस्थापनमाथि प्रश्न उठाएको छ।
विवादको केन्द्रमा राष्ट्रिय स्वतन्त्र पार्टी (रास्वपा) का कोल्हबी नगर सचिव मनोज चौधरीको नाम समेत जोडिएको छ। स्थानीयले भवन निर्माणका लागि बजेट व्यवस्थापनदेखि निर्माण प्रक्रियासम्म उनको प्रभाव रहेको दाबी गर्दै संरचना पूर्ण रूपमा सम्पन्न नभई भुक्तानी प्रक्रिया अघि बढाइएको विषयमा समेत छानबिन हुनुपर्ने माग गरेका छन्।
भवन निर्माण सम्पन्न भएपछि यसको सञ्चालन तथा व्यवस्थापनबारे स्पष्ट नीति नबनाइएकाले सार्वजनिक सम्पत्ति निजी प्रयोजनमा प्रयोग हुने अवस्था सिर्जना भएको स्थानीयहरूको भनाइ छ। उनीहरूले भवन लामो समयदेखि गोदामका रूपमा प्रयोग भइरहे पनि सम्बन्धित निकायले प्रभावकारी निगरानी नगरेको आरोप लगाएका छन्।
यस विषयमा प्रतिक्रिया माग्दा मनोज चौधरीले आफूले एक पटक भवनको प्रयोगबारे जानकारी पाएपछि प्रयोग नगर्न भनेको बताएका छन्। तर स्थानीयवासीहरूले भवन अझै पनि सोही प्रयोजनमा प्रयोग भइरहेको दाबी गर्दै जिम्मेवार पक्षले जवाफदेही बन्नुपर्ने बताएका छन्।
स्थानीयले सार्वजनिक सम्पत्तिको दुरुपयोग, निर्माण कार्यमा सम्भावित अनियमितता तथा व्यवस्थापनको कमजोरीबारे निष्पक्ष छानबिन गरी सत्यतथ्य सार्वजनिक गर्न माग गरेका छन्।
यता, घटनाबारे कोल्हबी नगरपालिकाको तर्फबाट भने हालसम्म कुनै औपचारिक धारणा सार्वजनिक भएको छैन। स्थानीयहरूले नगरपालिकाले विषयलाई गम्भीरतापूर्वक लिएर आवश्यक अनुसन्धान र अनुगमन गर्नुपर्ने बताएका छन्।
