कोल्हवीमा समाजसेवी रविन्द्र चौधरीको सशक्त सन्देश : पदभन्दा व्यवहार ठूलो, किसानका पीडातर्फ पनि ध्यानाकर्षण
बारा जिल्लाको कोल्हवी नगरपालिका वडा नं. ५ बलुवाका समाजसेवी रविन्द्र चौधरीले सामाजिक सञ्जालमार्फत मानवीय सम्बन्ध, पद, व्यवहार र समाजप्रतिको जिम्मेवारीबारे गम्भीर सन्देश सार्वजनिक गरेका छन्। पछिल्लो समय सार्वजनिक उनको भनाइले स्थानीय तहदेखि सामाजिक सञ्जालसम्म व्यापक चर्चा पाएको छ।
चौधरीले मानिस सफलताको शिखरमा पुग्दा साथ दिने साथीभाइ, परिवार र संघर्षका दिनमा साथ दिएका आफ्ना मान्छेहरूलाई बिर्सन नहुने बताएका छन्। उनले पद, प्रतिष्ठा र शक्ति क्षणिक हुने तर सम्बन्ध, सहयोग, मानवता र विश्वास जीवनका सबैभन्दा ठूला सम्पत्ति भएको उल्लेख गरेका छन्।
उनको भनाइ अनुसार कठिन समयमा काँध दिने व्यक्ति नै जीवनका साँचो धन हुन्। पद पाएपछि व्यवहार बदल्ने व्यक्तिले सम्मान नभई डर मात्र पाउने तर उचाइमा पुगेपछि पनि झुक्न जान्ने, सबैलाई सम्मान गर्ने र साथ दिने व्यक्ति नै वास्तविक अर्थमा महान बन्ने उनले सन्देश दिएका छन्।
चौधरीको यो सन्देश केवल व्यक्तिगत व्यवहारमा सीमित नभई समाजका विभिन्न समस्या समाधानसँग पनि जोडिएको स्थानीयवासीको भनाइ छ। विशेषगरी कोल्हवी नगरपालिका वडा नं. ५ का माछा किसानहरूले लामो समयदेखि भोग्दै आएको बजार व्यवस्थापन, उचित मूल्यको अभाव, बिचौलियाको हस्तक्षेप, उत्पादन लागत वृद्धि तथा सरकारी निकायको बेवास्ताजस्ता समस्याले किसानहरू चिन्तित बनेका छन्।
स्थानीय माछा किसानहरूका अनुसार मेहनत गरेर उत्पादन गरेको माछाले उचित मूल्य नपाउँदा किसान मारमा परेका छन्। बजारमा बिचौलियाको हावी हुँदा किसानले घाटा बेहोर्नुपरेको, तर उपभोक्ताले महँगो मूल्य तिर्नुपरेको अवस्था रहेको उनीहरूको गुनासो छ। व्यवस्थित माछा बजार, शीत भण्डारण, अनुदान र प्रत्यक्ष बिक्रीको वातावरण निर्माण गर्नुपर्ने माग किसानहरूले दोहोर्याउँदै आएका छन्।
यस्तो अवस्थामा चौधरीले दिएका “मान्छे पदले होइन, व्यवहारले ठूलो हुन्छ” भन्ने सन्देशलाई धेरैले जनप्रतिनिधि, जिम्मेवार निकाय तथा नेतृत्व तहलाई समेत संकेत गरेको रूपमा बुझेका छन्। स्थानीय सरोकारवालाहरूले जनताको दुःख, किसानको पीडा र श्रमिक वर्गका समस्याप्रति संवेदनशील भएर काम गर्नुपर्ने धारणा व्यक्त गरेका छन्।
सामाजिक सञ्जालमा सार्वजनिक उक्त भनाइलाई धेरैले सकारात्मक, प्रेरणादायी र समय सापेक्ष सन्देशका रूपमा लिएका छन्। कोल्हवी क्षेत्रका नागरिकहरूले समाजमा मानवता, सम्मान र जनसमस्याप्रति उत्तरदायी नेतृत्वको आवश्यकता रहेको बताएका छन्।
