भूमि सम्बन्धी फाइलमा ढिलासुस्तीप्रति रास्वपा निजगढको ध्यानाकर्षण, वडा कार्यालयलाई फाइल तत्काल पठाउन आग्रह
निजगढ, बारा । निजगढ नगरपालिकाका विभिन्न वडा कार्यालयबाट भूमि तथा जग्गासम्बन्धी सेवा प्रवाहमा ढिलासुस्ती भएको जनगुनासो बढेपछि राष्ट्रिय स्वतन्त्र पार्टी (रास्वपा) निजगढ नगर समितिले नगरपालिकाको ध्यानाकर्षण गराएको छ।
रास्वपा निजगढ नगर सभापति सन्दिप भट्टराई सहितको टोलीले नगरपालिकामा पुगेर भूमि सम्बन्धी सेवामा देखिएको ढिलासुस्ती, रोकिएका फाइल तथा सेवाग्राहीले भोग्नुपरेको समस्याबारे जानकारी गराउँदै तत्काल समस्या समाधानका लागि पहल गर्न आग्रह गरेको हो।
नगर समितिका अनुसार विभिन्न वडा कार्यालयबाट भूमि तथा जग्गासम्बन्धी काममा ढिलाइ भइरहेको भन्दै सेवाग्राहीबाट लगातार गुनासो आउन थालेपछि टोलीले स्थलगत रूपमा अनुगमन तथा सम्बन्धित पक्षसँग बुझ्ने काम गरेको थियो। सो क्रममा कतिपय फाइलहरू प्रक्रिया पूरा हुन नसक्दा रोकिएको तथा सेवाग्राहीले लामो समयसम्म कार्यालय धाउनुपर्ने अवस्था देखिएको समितिको भनाइ छ।
रास्वपा निजगढ नगर समितिले वडा अध्यक्षहरूलाई सम्बोधन गर्दै जनताको गुनासोलाई सामान्य रूपमा नलिन आग्रह गरेको छ। समितिले भूमि सम्बन्धी रोकिएका सम्पूर्ण फाइलहरू यथाशीघ्र नगरपालिकामा उपलब्ध गराउन वडा कार्यालयहरूलाई अनुरोध गरेको छ।
टोलीले जनताले वर्तमान सरकार तथा स्थानीय तहबाट सेवा प्रवाहमा सुधार हुने अपेक्षा राखेको उल्लेख गर्दै त्यस्तो आशालाई केवल आश्वासनमा सीमित नराखी व्यवहारमै परिवर्तन देखाउनुपर्नेमा जोड दिएको छ।
“जनताले यो सरकारप्रति ठूलो आशा र भरोसा राखेका छन्। उनीहरूको त्यो आशालाई केवल आश्वासनमा सीमित नराखी यथार्थमा परिणत गर्नु हामी सबैको साझा कर्तव्य हो,” रास्वपा नगर समितिको ध्यानाकर्षणमा उल्लेख गरिएको छ।
समितिले सेवाग्राहीलाई एउटै कामका लागि पटक–पटक वडा तथा नगरपालिका धाउनुपर्ने अवस्थाको अन्त्य गर्नुपर्ने बताएको छ। विशेषगरी भूमि तथा जग्गासम्बन्धी विषय संवेदनशील भएकाले फाइल लामो समयसम्म रोकिँदा नागरिकमा थप आर्थिक तथा मानसिक बोझ पर्ने भन्दै तत्काल प्रक्रिया अगाडि बढाउन माग गरिएको छ।
नगर सभापति सन्दिप भट्टराई नेतृत्वको टोलीले नगरपालिकासँग भूमि सम्बन्धी समस्याको वास्तविक अवस्था पहिचान गरी रोकिएका फाइलहरू छिटोभन्दा छिटो टुंग्याउने वातावरण बनाउन आग्रह गरेको छ।
रास्वपा निजगढ नगर समितिले जनताको सेवा नै स्थानीय सरकारको पहिलो प्राथमिकता हुनुपर्ने भन्दै वडा अध्यक्ष तथा नगरपालिकाका सम्बन्धित निकायलाई यस विषयमा गम्भीर भएर काम गर्न आग्रह गरेको छ।
भूमि सम्बन्धी सेवा लिन पुगेका नागरिकले लामो समयसम्म प्रक्रिया पूरा नभएको भन्दै गुनासो गरिरहेका बेला रास्वपा नगर समितिको यो पहललाई सेवाप्रवाहसँग जोडिएको विषयमा प्रत्यक्ष निगरानी र दबाबका रूपमा हेरिएको छ।
समितिले आगामी दिनमा पनि नागरिकका दैनिक सेवा तथा सार्वजनिक सरोकारका विषयमा स्थलगत रूपमा पुगेर वास्तविक अवस्था बुझ्ने र सम्बन्धित निकायको ध्यानाकर्षण गराउने जनाएको छ।
