तीन वर्षीया बालिका हत्या प्रकरणमा एसपी नरेन्द्र कुँवरको नेतृत्वमा अनुसन्धान तीव्र, दुई जना पक्राउ
सुरज बिक्रम | कलैया, भदौ ३ । बाराको जितपुरसिमरा उपमहानगरपालिका–१ भक्तिनगरमा तीन वर्षीया बालिका गरिमा चौधरीको मृत्यु भएको घटनामा जिल्ला प्रहरी कार्यालय बाराले अनुसन्धानलाई तीव्र बनाउँदै दुई जनालाई नियन्त्रणमा लिएको छ। घटना सार्वजनिक भएलगत्तै प्रहरी उपरीक्षक नरेन्द्र कुँवरको प्रत्यक्ष कमाण्डमा अनुसन्धान अघि बढाइएको प्रहरीले जनाएको छ।
भक्तिनगरस्थित वीरबहादुर रोकाको टायलले छाएको एकतले घरको खाली कोठामा भदौ २ गते साँझ करिब ५ः४५ बजे बालिका मृत अवस्थामा फेला परेकी थिइन्। बालिका मृत अवस्थामा भेटिएको सूचना प्राप्त भएपछि प्रहरी उपरीक्षक कुँवरले घटनालाई गम्भीरतापूर्वक लिँदै तत्काल अनुसन्धान टोली परिचालन गरेका थिए।
इलाका प्रहरी कार्यालय सिमराबाट प्रहरी नायब उपरीक्षक दिलिप क्षेत्रीको नेतृत्वमा टोली घटनास्थल पुगेपछि घटनास्थललाई सुरक्षित राखेर प्रारम्भिक अनुसन्धान सुरु गरिएको थियो। त्यसपछि जिल्ला प्रहरी कार्यालय बाराबाट प्रहरी उपरीक्षक कुँवरको कमाण्डमा थप अनुसन्धान टोली परिचालन गरिएको थियो।
घटनाको प्रकृति र सम्भावित संलग्न व्यक्तिबारे प्रमाण जुटाउन प्रदेश प्रहरी कार्यालय पर्सा, वीरगञ्जबाट तालिम प्राप्त कुकुरसहितको विशेषज्ञ टोलीसमेत घटनास्थलमा परिचालन गरिएको प्रहरीले जनाएको छ। घटनास्थलबाट प्राप्त हुन सक्ने भौतिक तथा अन्य प्रमाणलाई सुरक्षित राख्दै अनुसन्धान अघि बढाइएको प्रहरीको भनाइ छ।
अनुसन्धानका क्रममा मृत बालिका जितपुरसिमरा–१ दसधुरी बस्ने मनमती चौधरीकी तीन वर्षीया छोरी गरिमा चौधरी भएको खुलेको प्रहरीले जनाएको छ। गरिमा साउन ३१ गते बिहान करिब ८ः३० बजेदेखि घरबाट हराएकी थिइन्।
बालिका हराएपछि परिवार तथा स्थानीयस्तरबाट खोजी भइरहेको अवस्थामा केही दिनपछि उनको शव फेला परेको हो। शव फेला परेसँगै प्रहरीले घटनालाई सामान्य मृत्युको रूपमा नभई गम्भीर आपराधिक घटनाका रूपमा लिएर अनुसन्धान अघि बढाएको जनाएको छ।
प्रहरीको प्रारम्भिक अनुसन्धानअनुसार जितपुरसिमरा–२ का करिब १६ वर्षीय सुमन थापाले बालिकालाई चकलेट दिने प्रलोभन देखाएर घटनास्थलमा लगेको र त्यसपछि यौन दुर्व्यवहार तथा हत्या गरेको आशंका गरिएको छ। घटनाको वास्तविक कारण, घटनामा कसको कस्तो भूमिका थियो र अन्य व्यक्ति संलग्न भए–नभएको विषयमा अनुसन्धान जारी रहेको प्रहरीले जनाएको छ।
घटनामा प्रयोग भएको भनिएको ना.१ ज ७७५८ नम्बरको म्याजिकका सहचालक सुमन थापा र उक्त म्याजिकका धनी जितपुरसिमरा–१ निवासी २४ वर्षीय प्रोग्रेस चौधरीलाई प्रहरीले नियन्त्रणमा लिएको छ।
प्रहरी उपरीक्षक नरेन्द्र कुँवरको नेतृत्वमा अनुसन्धान टोलीले घटनास्थलको निरीक्षणदेखि सम्भावित प्रमाण संकलन, संलग्न व्यक्तिको पहिचान तथा पक्राउसम्मका प्रक्रियालाई अघि बढाएको प्रहरी स्रोतले जनाएको छ। तालिम प्राप्त कुकुरसहितको टोली परिचालन हुनु र अनुसन्धानका लागि विशेष टोली खटाइनुले घटनालाई प्रहरीले उच्च प्राथमिकतामा राखेको देखिएको छ।
प्रहरीले पक्राउ परेका व्यक्तिमाथि थप अनुसन्धान गरिरहेको छ। घटनासँग सम्बन्धित थप प्रमाण संकलन, बयान तथा अन्य अनुसन्धानात्मक प्रक्रिया पूरा गरेपछि घटनाको वास्तविकता थप स्पष्ट हुने प्रहरीले जनाएको छ।
बालिकाको मृत्युको घटनाले भक्तिनगर क्षेत्रमा शोक र त्रासको वातावरण सिर्जना गरेको छ। स्थानीयले घटनाको निष्पक्ष र गहिरो अनुसन्धान गरी दोषीमाथि कडा कानुनी कारबाही हुनुपर्ने माग गरेका छन्।
प्रहरी उपरीक्षक कुँवरले घटनालाई गम्भीरतापूर्वक लिँदै अनुसन्धानलाई प्रभावकारी बनाउन मातहतका प्रहरी अधिकारी तथा विशेष टोलीलाई परिचालन गरेको प्रहरीले जनाएको छ। प्रहरीले अनुसन्धानबाट प्राप्त प्रमाणका आधारमा घटनाको सत्यतथ्य बाहिर ल्याउने र दोषी देखिएका व्यक्तिमाथि प्रचलित कानुनअनुसार कारबाही अघि बढाउने जनाएको छ।
